Աթաթուրքի պատվիրանները խախտել են
Վարչապետ Էրդողանին մեղադրում են իսլամիզմ տարածելու համար

Պատրաստեց Սասուն Խաչատրյանը

Դատարանն իր որոշման պատճառները պարզաբանել է 370-էջանոց զեկույցում:

Թուրքիայի Սահմանադրական դատարանը որոշել է, որ իշխող «Արդարություն և զարգացում» կուսակցությունը, այնուամենայնիվ, հակաաշխարհիկ գործունեություն է ծավալել:

Երկրի աշխարհիկ ռեժիմին սպառնացող քայլեր ձեռնարկելու համար մեղադրվում են երկրի վարչապետ Ռեջեփ Թայիփ էրդողանը, Ազգային կրթության նախարար Հուսեին Չելիկը և կուսակցությունը ներկայացնող մի շարք այլ պաշտոնյաներ:

Հիշեցնենք, որ այս տարվա հուլիսին Թուրքիայի Սահմանադրական դատարանը Գլխավոր դատախազության համապատասխան հայցի հիման վրա հետաքննություն էր իրականացրել  և հակաաշխարհիկ գործունեության համար իշխող կուսակցությունից որպես տուգանք պահանջել էր հետ վճարել կուսակցությանը պետբյուջեից հատկացված գումարների կեսը: Ընդ որում՝ ՍԴ-ն որոշել էր չլուծարել կուսակցությունը:

Դատարանի պարզաբանումներում ասվում է, որ Էրդողանի և կուսակցության մյուս անդամների գործողությունները հակասում են Սահմանադրության 68-րդ հոդվածին։

2002թ. իշխանության եկած «Արդարություն և զարգացում» կուսակցությունը մեղադրվում է աշխարհիկ երկիրն իսլամիզացնելու փորձերի համար:

Իշխող կուսակցության դեմ ընդդիմադիրների քննադատության համար առիթ հանդիսացավ այն օրենքի ընդունումը, որով հանվում էր համալսարաններում մուսուլմանական գլխաշորեր կրելու արգելքը: Աշխարհիկ սկզբունքներով պետական կառուցվածքի ջատագովները գլխաշորերը դիտում են ոչ թե որպես զուտ հագուստի ատրիբուտ, այլ որպես ժամանակակից Թուրքիայում քաղաքական իսլամի վտանգավոր խորհրդանիշ:

370-էջանոց զեկույցում դատարանը պնդում է, որ իսլամիստական արմատներ ունեցող կուսակցությունը, քաղաքական շահեր հետապնդելով, օգտագործել է մարդկանց կրոնական զգայունությունը և քաղաքական թատերաբեմում խոչընդոտել հիմնական տնտեսական և սոցիալական խնդիրների քննարկումը:

2002թ. իշխանության գալուց ի վեր AKP-ն պայքարի մեջ է երկրի հզոր աշխարհիկ վերնախավի հետ, ներառյալ՝ դատավորներ և բանակի գեներալներ:

Աշխարհիկ թուրքերը պնդում են, որ կուսակցությունը փորձում է կրոնը կրկին հանրային կյանք վերադարձնել, ինչը հակասում է երկրի գլխավոր օրենքին: AKP-ականներն այս մեղադրանքները հերքում են: