Լավ լուր հայ գյուղացիների համար
Վրաստանում կարտոֆիլի ցածր բերք է եղել

Կապիտալ

Այս տարի Հայաստանը կարող է լուծել շուրջ 150 հազ. տոննա կարտոֆիլի ավելցուկի իրացման հարցը Վրաստանում։

Հայաստանի գյուղատնտեսության համար լավ հնարավորություն է բացվում։ Այս տարի Հայաստանը կարող է լուծել շուրջ 150 հազ. տոննա կարտոֆիլի ավելցուկի իրացման հարցը Վրաստանում։

Սպասվում է, որ Վրաստանում  կարտոֆիլն այս տարի կթանկանա առնվազն երկու անգամ: Կարտոֆիլ աճեցնողների միության տարածած հաղորդագրության համաձայն՝ կարտոֆիլի ցածր բերքատվությունը պայմանավորված է եղանակային ոչ բարենպաստ պայմաններով:

Ինչպես հաղորդում է «Բիզնես Գրուզիի» կայքը, Վրաստանում կարտոֆիլի սպասվելիք բերքը կբավարարի երկրի պահանջարկի 40%-ը, և ներքին շուկայում առաջանալու է տեղական կարտոֆիլի պակասուրդ և կարտոֆիլի գնի աճ։

Միության ներկայացուցիչների հայտարարության համաձայն՝ կարտոֆիլի թանկացմանը նաև նպաստում է վառելիքի գնի բարձրացումը, ինչի արդյունքում մթերքի տեղափոխումը շրջաններից մայրաքաղաք ավելի թանկ է դառնում։ Այսօր Թբիլիսիում 1 կգ կարտոֆիլի գինը կազմում է 30-50 թեթրի (Դ70-Դ120)։

Վրաստանի գյուղատնտեսության նախարարությունը կտրականապես բացառում է կարտոֆիլի գնի բարձրացումը՝ մեկնաբանելով, որ ընթացիկ տարում Բոլնիսիում բարձր բերք է եղել, ինչը որոշակիորեն կփոխհատուցի Ախալցխայում և Ախալքալաքում գրանցված ցածր բերքատվությունը:

Պետական կառույցի տեղեկատվության համաձայն՝ միջին գործարարները ձմռանը կարտոֆիլը ներկրում են հիմնականում Հայաստանից, մի մասն էլ՝ Թուրքիայից և Իրանից:

Հայաստանի գյուղատնտեսության նախարար Գերասիմ Ալավերդյանի կանխատեսմամբ՝ ավելի քան 30 հազ. հա կարտոֆիլի ցանքատարածությունից այս տարի սպասվում է 600-620 հազ. տոննա բերք։

Կարտոֆիլի ներքին տարեկան պահանջարկը Հայաստանում կազմում է 350-400 հազ. տոննա։ Նախարարի գնահատմամբ՝ այս տարի Հայաստանը պետք է լուծի 100-150 հազ. տոննա կարտոֆիլի իրացման խնդիրը։