Գյուղերում՝ տիպային տներ
Կառավարությունը հետաքրքիր նախաձեռնությամբ է հանդես գալիս

Կապիտալ

Հայաստանում կլինի պետականորեն հաստատված տիպային անհատական տների կատալոգ:

Հայաստանում կլինի պետականորեն հաստատված տիպային անհատական տների կատալոգ: Կառավարությունը որոշել է անհատական բնակելի տների կառուցման հարցում ներդնել տիպային տների կառուցման մշակույթը։ Այդ նպատակով ստեղծվելու է տիպային անհատական տների կատալոգ, որտեղ կներառվեն մրցույթով ընտրված նախագծերը։

Եթե քաղաքացին ցանկանա անհատական տուն կառուցել կատալոգում ընդգրկված նախածգով, ապա կընդունվի, որ դրանք անցել են բոլոր փորձաքննությունները, և բյուրոկրատական քաշքշուկները կհասցվեն մինիմումի:

Երեկ կառավարության նիստին վարչապետ Տիգրան Սարգսյանը նշեց, որ Հայաստանում հաճախ հանդիպում են էկլեկտիկ կառուցված անհատական տների, և ցանկացած գյուղում յուրաքանչյուրը տուն է կառուցոմ իր պատկերացումներով, ֆինանսական հնարավորությունների շրջանակներում։

Ֆինանսական միջոցների սղության պատճառով կառուցումը հաճախ իրականացվում է առանց նախագծի, նախահաշվի։

«Նրանք չունեն համապատասխան միջոցներ, որպեսզի պատվիրեն նախագծեր: Հետագայում առնչվում են լուրջ խնդիրների, բյուրոկրատական քաշքշուկների, օրինականացման գործընթացում խնդիրների, տարրական անվտանգության հարցերի, որոնք ծագում են այս պարագայում»,- ասաց վարչապետը։

Վարչապետը նշեց, որ կատալոգը քաղաքացիներին հնարավորություն է տալիս ընտրել տասը և ավելի նախագծերից մեկը, կատարել շինարարություն, ինչի արդյունքում նրանց ծախսերն էապես կնվազեն, քանի որ այդ նախագծերը կտրամադրվեն անհատույց:

Այդ կատալոգը կտպագրվի և կբաժանվի բոլոր մարզերին, համայնքներին և կտեղադրվի նաև ինտերնետում: