Անշարժ գույքի շուկան ճգնաժամից դուրս է գալիս
Բյուջետային երաշխիքները նպաստել են դրան

Կապիտալ

Հայաստանի վարչապետի օգնական Դավիթ Հարությունյանն ասում է, որ անշարժ գույքի շուկան ճգնաժամից դուրս է գալիս։

ՀՀ կառավարության աշխատակազմը լրագրողներին խոստանում է յուրաքանչյուր ուրբաթ մամուլի ասուլիս հրավիրել և տեղեկացնել հակաճգնաժամային միջոցառումների ընթացքի և արդյունքների մասին:

Աշխատակազմի նախաձեռնությունը, ինչ խոսք, խրախուսելի է:

Առաջին ասուլիսը նվիրված էր կառուցապատողներին: ՀՀ վարչապետի օգնական, տնտեսական զարգացման օժանդակող խմբի ղեկավար Դավիթ Հարությունյանը մի շարք հուսադրող տվյալներ հրապարակեց:

Ըստ այդ տեղեկատվության՝ Հայաստանի անշարժ գույքի շուկան ճգնաժամից դուրս է գալիս. հուլիսին 36.1%-ով ավելացել են առուվաճառքի գործարքները, անշարժ գույքի գները կայունացել են, իսկ բանկերի հիպոթեկային պորտֆելն ավելացել է մինչև Դ90 մլրդ՝ տարեսկզբի Դ88 մլրդ-ի համեմատ:

Անշարժ գույքի նկատմամբ պահանջարկը խթանելու համար Կենտրոնական բանկը ստեղծել է Ազգային հիպոթեկային ընկերությունը՝ Դ5 մլրդ կանոնադրական կապիտալով: Այն իր գործունեությունը սկսել է հուլիսից և հասցրել է վերաֆինանսավորել 30 վարկ՝ Դ150 մլն ընդհանուր ծավալով: Եվս 60 վարկ՝ Դ300 մլն ընդհանուր ծավալով, վերաֆինանսավորման կներկայացվի այս ամսվա ընթացքում:

Կառավարությունը, իր հերթին, քայլեր է իրականացրել անշարժ գույքի շուկայում առաջարկը խթանելու համար: Այդ նպատակով կառուցապատող ընկերություններին տրամադրվում են բյուջետային երաշխիքներ:

Ներկա պահին 6 կառուցապատող ընկերություն ստացել է ընդհանուր առմամբ մոտ Դ5 մլրդ բյուջետային երաշխիք՝ 116 հազ. քմ շինարարություն իրականացնելու համար: Քննարկման փուլում են ևս 2-3 հայտեր: Բոլոր այդ ընկերություններն իրականացնում են էլիտար շենքերի շինարարություն Երևանում:

Դ. Հարությունյանը դժվարացավ պատասխանել, թե դաշտում քանի կառուցապատող ընկերություն կա, և նրանց որ մասն է դիմում երաշխիք ստանալու համար: Նրա կարծիքով՝ կարևորը ծավալները չեն, այլ այն, որ կառավարությունն ազդակներ է փոխանցում շուկային:

Վարչապետի օգնականը նշեց, որ կառավարությունը խիստ պահանջներ է ներկայացնում բյուջետային երաշխիքի հայտ ներկայացնող կառուցապատողներին: Նախ՝ ֆինանսավորման ենթակա բազմաբնակարան շենքը պետք է ունենա առնվազն 50% ավարտվածություն (նախկինում այն սահմանված էր 75%):

Երկրորդ՝ կառուցապատողը պետք է ինքը բանկի հետ վարի բանակցությունները, որի արդյունքում բանկը պետք է գրավոր եզրակացություն տա այն մասին, որ պատրաստ է բյուջետային երաշխիքով վարկ տրամադրել: Այդ կերպ, ըստ Հարությունյանի, կառավարությունը խուսափում է անարդյունավետ նախագծեր ֆինանսավորելուց, քանի որ բանկը ռիսկերի մի մասը վերցնում է իր վրա: Պետական երաշխիքը վերաբերում է միայն վարկի մայր գումարին, իսկ տոկոսների մասով ռիսկերը բանկինն են: Ի դեպ, բյուջետային երաշխիքի դեպքում բանկերը վարկը տրամադրում են համեմատաբար ցածր տոկոսադրույքով՝ 13-16%:

Երրորդ՝ հայտ ներկայացվող ընկերությունները չպետք է հարկային կամ ֆինանսավարկային կազմակերպությունների հետ չլուծված խնդիրներ ունենան:

Այս պայմանները, ըստ կառավարության ներկայացուցչի, բավական խիստ են, այդ պատճառով էլ նախատեսված Դ20 մլրդ-ից օգտագործվել է փոքր մասը միայն: