Տեխնիկական խոտանով 
«Օրանժ Արմենիան» հայտարարում է մոտալուտ գալստյան մասին

Արմենակ Չատինյան

Հայաստանում երրորդ բջջային օպերատոր «Օրանժ Արմենիան» ծառայություններ կսկսի մատուցել այս տարվա նոյեմբերի 5-ին։

Հայաստանում երրորդ բջջային օպերատոր «Օրանժ Արմենիան» ծառայություններ կսկսի մատուցել այս տարվա նոյեմբերի 5-ին՝ առաջարկելով շարժական հեռախոսակապ և ինտերնետ:

Ընկերության հանրային կապերի պատասխանատու Լիլիթ Մարտիրոսյանը «Կապիտալի» հետ զրույցում նշեց, որ ընկերության ծածկույթը չի սահմանափակվելու Երևանով և հիմնական բնակավայրերով, այլ ներառելու է ողջ հանրապետությունը։ Ծածկույթի վերաբերյալ մանրամասները նա խոստացավ ներկայացնել նոյեմբերի 5-ին։

«Օրանժ Արմենիայի» երեկ տարածած հաղորդագրությունում նշված էր, որ ապագա բաժանորդները կարող են գրանցել 055 կոդով սկսվող նախընտրած հեռախոսահամարը ընկերության վեբկայքում՝ դրա համար լրացնելով համապատասխան առցանց դիմումը, որպեսզի նոյեմբերի 5-ից հետո 15 օրվա ընթացքում հնարավոր լինի անվճար ձեռք բերել նախապես գրանցված հեռախոսահամարը և դառնալ ընկերության բաժանորդ:

Ուշագրավ է, որ «Օրանժ Արմենիայի» հաղորդագրության տարածումից ընդամենը մի քանի ժամ անց ընկերության կայքէջում այլևս հնարավոր չէր հեռախոսահամար ստանալու համար լրացնել առցանց դիմումը (հավանաբար այցելուների մեծ թվի պատճառով սերվերը կախվել է):

Թեև սա տեխնիակական մանրուք է, սակայն առաջին հրապարակային խոտանը կարող է վնասել ընկերության իմիջը: Համենայն դեպս, տեխնիկական նման պրոբլեմը գոնե «Ֆրանս Տելեկոմի» համար պետք է անցած փուլ լիներ:

Orange-ը Հայաստանում շարժական կապի ծառայություններ մատուցելու լիցենզիա է ստացել 2008թ. նոյեմբերի 19-ին (ընկերության հաղորդագրությունում նշված է 2009թ. նոյեմբերի 19-ը): Փաստացի, ընկերությունը մրցութային պայմանների հիմնական մասը կատարել է մեկ տարի շուտ։

Մրցութային պայմաններում ամրագրված է, որ ոչ ուշ, քան լիցենզիան ստանալու ամսաթվից երկու տարվա ընթացքում ընկերությունը պարտավոր է GSM  բացօդյա ծածկույթ ապահովել Երևանում  և 42 բնակավայրում, իսկ երեք տարվա ընթացքում ծածկույթ ապահովել ոչ պակաս, քան 200 գյուղում, ինչպես նաև Հայաստանի տրանսպորտային միջպետական մայրուղիների երկայնքի 85%-ում: