Ադրբեջանցիներն ստիպեցին փոխել «Եվրատեսիլի» կանոնները
Քվեարկողների մասին տվյալներ հրապարակելու համար պատասխան են տալու հեռուստաընկերությունները

Կարմեն Ղուկասյան

«Եվրատեսիլ» երգի մրցույթի կազմակերպիչները փոխել են քվեարկության կանոնները:

«Եվրատեսիլ» երգի մրցույթի կազմակերպիչները փոխել են քվեարկության կանոնները:

Ինչպես հայտնում է մրցույթի պաշտոնական կայքէջը, «Եվրատեսիլ-2010»-ի ժամանակ, որը տեղի կունենա 2010թ. մայիսին Նորվեգիայի մայրաքաղաք Օսլոյում, հեռուստադիտողները կարող են քվեարկել իրենց դուր եկած մասնակցի օգտին՝ զանգահարելով կամ հաղորդագրություն ուղարկելով շոուի ամբողջ ընթացքում և ոչ թե համերգի ավարտից հետո՝ 15 րոպեի ընթացքում, ինչպես ընդունված էր նախկինում:

Կազմակերպիչների կարծիքով՝ շոուի ընթացքում քվեարկությունն ավելի տրամաբանական է, քան դրանից հետո: Բացի այդ՝ դա չի առաջացնի հեռախոսագծերի ծանրաբեռնվածության խնդիր:

Նշենք, որ այս տարի «Եվրատեսիլի» կանոններում կատարվել է ևս մեկ փոփոխություն: Ադրբեջանում տեղի ունեցած սկանդալից հետո որոշվել է պատասխանատվության ենթարկել այն հեռուստաընկերությանը, որը քվեարկող անձանց մասին տեղեկություններ կհրապարակի: Նախկինում այդպիսի խախտման համար պատասխանատվություն էին կրում հեռահաղորդակցային ծառայություններ մատուցող ընկերությունները:

Հիշեցնենք՝ Ադրբեջանի որոշ բնակիչներ, որոնք վերջին մրցույթում քվեարկել էին Հայաստանը ներկայացնող մասնակիցների օգտին, հարցաքննության էին ենթարկվել Ադրբեջանի ազգային անվտանգության նախարարության կողմից:

Հիշեցնենք, որ «Եվրատեսիլի» վերջին մրցույթում, որը տեղի ունեցավ Մոսկվայում մայիսի 12-16-ը, հաղթեց Նորվեգիան ներկայացնող ծագումով բելառուս Ալեքսանդր Ռիբակը: Հենց նրա շնորհիվ էլ «Եվրատեսիլ-2010»-ը կանցկացվի Օսլոյում: