Բանաձևի ներկայացումը Սենատ ճնշում է Սպիտակ տան վրա 
Կարծում է Կիրո Մանոյանը

ԹԵՐԹ.am

Կ.Մանոյանն առաջարկում է «աշխարհին փոխանցել այն մոտեցումները, որոնք նշված էին արձանագրությունների ստորագրման օրը նախագահ Սերժ Սարգսյանի ուղերձում»։

Հոկտեմբերի 21-ին ԱՄՆ Սենատ ներկայացված Հայոց ցեղասպանության ճանաչման մասին թիվ 252 բանաձևը ինչ-որ տեղ բողոքի արտահայտություն է հայ-թուրքական արձանագրություններով նախատեսված պատմաբանների ենթահանձնաժողովի ստեղծման դեմ: Երեկ «Հայացք» ակումբում հրավիրված ասուլիսին նման կարծիք է հայտնել ՀՅԴ քաղաքական հարցերի և Հայ դատի գրասենյակի ղեկավար Կիրո Մանոյանը:

Նա նշել է, որ հիշյալ բանաձևի ներկայացումը Սենատ նաև ճնշում է Սպիտակ տան վրա, որպեսզի ԱՄՆ-ը նախ՝ ճանաչի Հայոց ցեղասպանությունը, ապա՝ տարանջատի Հայոց ցեղասպանության ճանաչումը հայ-թուրքական արձանագրություններից:

Կիրո Մանոյանն անդրադարձել է նաև միջազգային պարբերականների այն մոտեցմանը, թե արձանագրությունները ստորագրելով՝ Հայաստանն ինքն է Հայոց ցեղասպանության փաստը դնում կասկածի տակ:

ՀՅԴ Հայ դատի գրասենյակի ղեկավարն ասել է, թե որպեսզի միջազգային մամուլը, ինչպես նաև միջազգային հանրությունն արձանագրությունների իմաստն այդպես չընկալի, հսկայական աշխատանք պետք է կատարի հայկական դիվանագիտությունը: Ըստ Մանոյանի՝ այն պետք է կարողանա աշխարհին փոխանցել այն մոտեցումները, որոնք նշված էին արձանագրությունների ստորագրման օրը նախագահ Սերժ Սարգսյանի ուղերձում:

Դաշնակցական գործիչը չի համաձայնել այն կարծիքին, թե արձանագրությունների ստորագրումից հետո Հայոց ցեղասպանության ճանաչման բանաձևի ներկայացումը Սենատ խոսում է հակառակի մասին, այն է՝ հայկական կողմը կասկածի տակ չի դնում Հայոց ցեղասպանության փաստը:

«Լավագույն դեպքում դա պարզամիտ մեկնաբանություն է, վատագույն դեպքում՝ դա չարամիտ մեկնաբանություն է»,- հայտարարել է Կիրո Մանոյանն ու հավելել, որ բանաձևի ներկայացումը դեռ չի նշանակում, որ այն պետք է որդեգրվի: