Հայաստանը 3:1 հաշվով հաղթում է Իսպանիային
Մեր ընտրանու հաջողությունն ապահովեցին Գաբրիել Սարգսյանն ու Տիգրան Պետրոսյանը

Լևոն Սարգսյան

Լևոն Արոնյանը ոչ-ոքի է խաղացել Ալեքսեյ Շիրովի հետ:

Շախմատի Հայաստանի հավաքականը Եվրոպայի թիմային առաջնության 6-րդ տուրում 3:1 հաշվով վստահ հաղթանակ տոնեց Իսպանիայի նկատմամբ: Մեր ընտրանու հաջողությունն ապահովեցին 3-րդ և 4-րդ խաղատախտակների վրա ելույթ ունեցող Գաբրիել Սարգսյանն ու Տիգրան Պետրոսյանը, որոնք իրենց պարտիաներն ավարտեցին հաղթանակներով:

Տուրի կենտրոնական խաղում խաղաղությամբ բաժանվեցին Ադրբեջանի և Ռուսաստանի հավաքականները:

6-րդ տուրում միավորներ կորցնելու դեպքում Հայաստանը գործնականում կզրկվեր առաջին տեղում հայտնվելու հնարավորությունից, ուստի Իսպանիայի հետ մրցավեճում միայն հաղթանակ էր անհրաժեշտ:

Մրցամարտի 4 պարտիաներից առաջինն ավարտվեց Տիգրան Պետրոսյանի մասնակցությամբ հանդիպումը, որում օլիմպիական չեմպիոնն առավելության հասավ Լոպես Իվան Սալգադոյի նկատմամբ: Քիչ անց Գաբրիել Սարգսյանը հաղթեց Կորդոբա Իլեսկասին, իսկ Լևոն Արոնյանը ոչ-ոքի խաղաց Ալեքսեյ Շիրովի հետ: Կես միավոր վաստակեց նաև Վլադիմիր Հակոբյանը:

Առաջատարների մասնակցությամբ հանդիպումներում գրանցվեցին ոչ-ոքիներ: 2:2 հաշվով ավարտվեցին Ադրբեջան-Ռուսաստան և Ուկրաինա-Վրաստան հանդիպումները:

Ադրբեջանի հավաքականը 11 միավորով գլխավորում է աղյուսակը, իսկ Հայաստանի, Ռուսաստանի, Վրաստանի և Սերբիայի հավաքականներն ունեն 9-ական միավոր:

Լիլիթները փրկեցին Հայաստանը

Եվրոպայի թիմային առաջնության 6-րդ տուրում Հայաստանի կանանց հավաքականը 2:2 հաշվով ավարտեց Ֆրանսիայի հետ մրցավեճը: Հայ շախմատիստուհիներից հաղթանակներ տոնեցին Լիլիթ Մկրտչյանը և Լիլիթ Գալոյանը, իսկ Էլինա Դանիելյանը և Սիրանուշ Անդրեասյանը պարտվեցին:

Այս ոչ-ոքիից հետո Հայաստանը 8 միավորով ընթանում է 6-րդ հորիզոնականում: Մրցաշարային աղյուսակը գլխավորում են Վրաստանի և Ռուսաստանի հավաքականները, որոնք վաստակել են 10-ական միավոր: