Տասն անգամ ավելի կարճ
Հայաստանում՝ ՓՄՁ-ների համար նախատեսված ֆինանսական հաշվետվությունների նոր ստանդարտ

Կապիտալ

Հայաստանի ընկերությունների մի մասը կանցնի ՓՄՁ-ների համար նախատեսված ֆինանսական հաշվետվությունների նոր ստանդարտի։

Փոքր և միջին ձեռնարկությունների համար նախատեսված նոր ֆինանսական հաշվետվությունների միջազգային ստանդարտը (ՓՄՁ-ների համար՝ ՖՀՄՍ) կարող է փոխակերպել ամբողջ աշխարհի մասնավոր ընկերությունների հաշիվների կազմման գործընթացը:

Հաշվապահական միջազգային ստանդարտների խորհրդի կողմից նոր ստանդարտի հրապարակումն աշխարհի մասնավոր ընկերություններին ստանդարտացված հաշվապահական համակարգ ստեղծելու բացառիկ հնարավորություն է ընձեռում:

ՓՄՁ-ների համար ՖՀՄՍ-ն մասնավոր հատվածի ընկերությունների համար մշակված, միջազգայնորեն ճանաչված հաշվապահական սկզբունքների փաթեթ է:

Հիմնված լինելով ՖՀՄՍ-ների ամբողջական տարբերակի վրա, որ մշակվել էր հիմնականում ցուցակված ընկերությունների համար՝ նոր ստանդարտը մասնավորապես օգտակար կլինի միջազգային գործունեություն ծավալող ընկերությունների համար: Յուրաքանչյուր երկիր այժմ արդեն կարող է նկատի առնել այս ստանդարտը, քննարկել տեղական շահառուների հետ և որոշել, թե արդյոք այն կիրառելի է տվյալ երկրում, և երբ այն ներմուծել:

Հայաստանում վերջին օրենսդրական փոփոխություններից հետո որոշ կազմակերպություններ, այդ թվում՝ բանկերը, ապահովագրական և վարկային կազմակերպությունները, իրենց ֆինանսական հաշվետվությունները պետք է կազմեն ՖՀՄՍ-ի համաձայն: Այլ կազմակերպություններ, որոնց վրա պահանջը չի տարածվում, կարող են իրենց նախաձեռնությամբ տեղական ստանդարտներից անցնել ՖՀՄՍ-ին:

«Աշխարհի այն չցուցակված ընկերությունները, որոնց այսուհետև կպարտադրեն համապատասխանել ՖՀՄՍ-ի ամբողջական տարբերակին, ուրախությամբ կպարզեն, որ նոր ստանդարտն ամբողջական ՖՀՄՍ-ից տասն անգամ ավելի կարճ է, իսկ հնարավոր խախտումների թիվը մոտ 300 է ներկայիս 3,000-ի փոխարեն»,- մեկնաբանում է «Գրանթ Թորնթոն Ամիօ» ընկերության բաժնետեր Էմիլ Վասիլյանը:

«Գրանթ Թորնթոնում» կարծում են, որ ՓՄՁ-ների համար ՖՀՄՍ-ների ընդունումն ավելի մանրակրկիտ ուսումնասիրության պետք է ենթարկվի այն երկրներում, որտեղ մասնավոր ընկերությունները դեռ օգտագործում են տեղական ստանդարտները: Օրինակ՝ Եվրամիության երկրներում ՓՄՁ-ներն այսօր կիրառում են ֆինանսական հաշվետվությունների մոտ 55 համակարգեր:

Մյուս կողմից՝ անցումը հաշվապահական հաշվառման նոր ստանդարտներին պահանջում է որոշ ֆինանսական և ռեսուրսներին առնչվող ծախսեր: Ընկերություններն ու նրանց խորհրդատուները պետք է սովորեն նոր եզրույթներ և հաշվապահության վարման մանրամասներ, ինչպես նաև փոփոխություններ կատարեն օգտագործվող համակարգչային ծրագրերում:

Չնայած այս մարտահրավերների առկայությանը՝ «Գրանթ Թորնթոնում» կարծում են, որ այս կարճաժամկետ անհարմարության դիմաց մասնավոր ընկերությունները մեծապես կշահեն երկարաժամկետ կտրվածքով:

«Այս նոր ստանդարտի շնորհիվ ստեղծվում է մի իրավիճակ, որում վարկատուներն ու ներդրողները հնարավորություն են ստանում ֆինանսական հաշվետվությունների հիման վրա գնահատել ընկերության կատարողականը, այն պարագայում, երբ դրանք կազմվել են ուղղակիորեն համադրելի, վստահելի և միջազգային ճանաչում ունեցող սկզբունքների հիման վրա՝ անկախ նրանից, թե որ երկրում է գործում ընկերությունը: Մասնավոր հատվածի ընկերությունների վրայից վարչական բեռի թեթևացման հետ մեկտեղ այն կնպաստի կապիտալի մատչելիության բարձրացմանը և միջազգային գործարքների կայացմանը»,- պարզաբանում է Ալեքս Մաքբիթը, որը «Գրանթ Թորնթոն Ինթերնեշնլի»՝ մասնավոր հատվածի ձեռնարկություններին մատուցվող ծառայությունների գծով ղեկավարն է: