Երրորդ սերնդի մարտահրավեր
«ՎիվաՍել-ՄՏՍ»-ը 3G կմատուցի նաև մարզերում

Կապիտալ

«ՎիվաՍել-ՄՏՍ»-ը 3G կմատուցի նաև մարզերում։

Հայաստանի շարժական կապի օպերատոր «ՎիվաՍել-ՄՏՍ»-ը իր մարզային բաժանորդների բազայի պահպանմանն ուղղված կարևոր քայլեր է կատարում: Երեկ այս ընկերությունն ազդարարեց Հայաստանի ևս 47 քաղաքներում և գյուղական խոշոր համայնքներում 3G ծառայություններ մատուցելու մասին:

Նշենք, որ ապրիլի երկրորդ կեսից ընկերությունը 3G ծածկույթ է ապահովել Երևանում, Գյումրիում և Վանաձորում։ «ՎիվաՍել-ՄՏՍ»-ն ակնկալում է, որ նոր սերնդի ցանցի շնորհիվ ոչ միայն կկարողանա պահպանել, այլև կավելացնի բաժանորդային բազան:

3G ցանցի ընդլայնումով «ՎիվաՍել-ՄՏՍ»-ը ապահովում է նաև ինտերնետ հասանելիություն մարզերում, որոնք կարծես դուրս են մնացել ինտերնետ պրովայդերների տեսադաշտից։

Ուշագրավ է, որ «ՎիվաՍել-ՄՏՍ»-ը լայնամասշտաբ այս քայլն անում է նոր օպերատորի՝ «Օրանժ Արմենիայի» մեկնարկից ընդամենը մի քանի օր առաջ («Օրանժը» Հայաստանում ծառայություններ կսկի մատուցել նոյեմբերի 5-ին):

Ի դեպ, «Օրանժ Արմենիան» երեկ հաղորդագրություն է տարածել, որ Հայաստանում կատարել է շուկայի ուսումնասիրություններ՝ որպես բջջային նոր օպերատոր իր պոտենցիալ բաժանորդների թվի մոտավոր պատկերը կազմելու համար:

Ընկերության գլխավոր տնօրեն Բրունո Դյութուան ասել է, թե, ըստ հետազոտության արդյունքների, իրենց առաջարկած կապից կօգտվեն առաջին անգամ բջջային հեռախոս գործածել ցանկացողները և հանրապետությունում արդեն գործող օպերատորների ծառայություններից օգտվողները:

Ըստ Դյութուայի՝ Հայաստանում 15 տարեկանից բարձր անձանց 20%-ը չի օգտվում բջջային որևէ կապից: